#إزاي_تجيب_فلوس..؟
إيه يا عم الدخله الغريبه دي..!!
سيبك من الدخله و سيب أي حاجه في إيدك دلوقتي و ركز معايا في اللي جاي.. البوست ده ملخص حوار كان بين أحد المهندسين حديثي التخرج زي حالاتك كده و بين المهندس/ مصطفى عفيفي في مكتبه و كان الكلام عن الشغل الخاص في المقاولات و قدرنا نسجل الحوار و كتبناه ليكم يمكن تستفيدوا منه..

في البدايه خلينا بس نتفق على شويه حاجات مهمه..
---------------------------------------------

1- الفلوس مش هي كل حاجه.. الستر و الصحه و راحه البال و الرضا أهم
2- الفلوس في حد ذاتها مش غايه تضيع عمرك عشانها و لكنها وسيله هاتساعدك إنك تحقق أهدافك الأساسيه
3- الفلوس مهمه عشان تعرف تعيش في مستوى اجتماعي كويس.. تتعالج كويس.. تعلم أولادك كويس.. إلخ
4- لو اكتفيت بشغلك كموظف في شركه و أياً كان راتبك غالباً مش هاتعرف تحوش فلوس
5- اللي هانتكلم عنه في البوست ده تحديداً هو إزاي تجيب فلوس من شغل المقاولات

خلي بالك هاتحتاج تبقى قاعد رايق و مركز جداً و انت بتقرا البوست ده و ياريت لو تقوم تعملك مج نسكافيه 3*1 و تيجي تكمل قرايه و ماتنساش تجيب معاك Calculator عشان هاتحتاجها

----------------------------------------------------------------------

نبدأ الحوار..

س: هل شغل المقاولات الخاص بيكسب فلوس؟

= هع هع هع... (ضحكات شريره متقطعه تتبعها رشفه من فنجان القهوه) أحب اقولك إن شغل المقاولات يعتبر بدون مبالغه هو أكتر حاجه بتكسب فلوس بعد تجاره المخدرات و الآثار.. لأنه يعتبر مزيج بين الهندسه و التجارة.. و كلنا عارفين إن تسعه أعشار الربح في التجارة، و خليني أضربلك مثال بسيط عشان تبقى متخيل.. عارف لو أخدت شقه واحدة بس تشطبها هاتكسب كام؟ لو شقه متوسطه تكلفه تشطيبها مش هاتقل عن 100 ألف جنيه.. و نسبه الربح المتعارف عليها للإشراف الهندسي مش أقل من 15% و ممكن توصل لـ25% يعني حضرتك هاتكسب من الشقه (صافي ربح) 15 ألف جنيه.. الشقه دي ممكن تخلص في 3 شهور.. و ده على افتراض إنها شقه عاديه.. إنما لو فيلا مثلاً و أخدتها تشطيبات و لو افترضنا إنها هاتتكلف 500 ألف جنيه (و ده مبلغ قليل على تشطيب فيلا على فكره) يبقى ربحك هايكون على الأقل 15% يعني 75 ألف جنيه.. و بالكتير هاتخلص في 6 شهور لو انت شغال براحتك كمان..
طب لو معاك شقتين أو تلاته.. فيلتين بتشطبهم.. إحسب بقى الأرقام و قولي ممكن يكون مكسبك منهم كام
نتكلم بقى عن لو هاتخد عمارة أو فيلا خرسانات و تشطيبات من البدايه خالص و تعالى نحسبها.. بس صلي على النبي في سرك الأول.. بص يا سيدي.. لو حته أرض مساحتها 400 متر مثلاً و هايتبني عليها عمارة 10 أدوار هاتتكلف تقريبا ً مش أقل من 2 مليون جنيه لحد مرحله نص التشطيب.. مكسب المهندس اللي هاينفذها هايكون 15% منهم احسبها بقى على الCalculator اللي معاك هاتلاقي الناتج 300 ألف جنيه.. و قبل ماتتخض من الرقم و ال Calculator بتاعتك ماباظتش ولا حاجه ده رقم منطقي لمكسب شغل المقاولات على فكره.. خلي بالك إحنا لسه ماشطبناش العمارة.. مش عاوز أقولك إن لو شطبتها الرقم ده هايتضرب في 2 بس عشان الحسد

س: بشمهندس.. أنا حاسس إن الكلام ده مش منطقي و إن الأرقام دي مبالغ فيها.. حاسس إن فيه حاجه غلط؟
= طب بص.. إسأل الناس اللي شالوا شغل مقاولات قبلك و نجحوا فيها هاتلاقي كل كلمه قولتهالك صح

س: طب طالما الموضوع مربح كده.. ليه مش كل المهندسين بيعملوا كده؟
= ده يا سيدي لكذا سبب.. لأن أغلب المصريين للأسف إتربوا على ثقافه اللي نعرفه أحسن من اللي منعرفوش.. و دي قتلت جواهم أي رغبه في المجازفه أو في تجربه حاجه جديدة.. ده غير الإحباط اللي هايلاقوه من اللي حواليهم لو حبوا ياخدوا خطوه زي دي و هايسمعوا بقى كلام من عينه.. يا ابني شوفلك وظيفه في الحكومه أحسن.. إن فاتك الميري اتمرمغ في ترابه.. و ناس كتير منهم نفسهم ياخدوا الخطوة دي فعلاً بس إما مش مؤهلين ليها أو مش عارفين يبدأوا إزاي..

س: هل أي مهندس يقدر يشيل شغل مقاولات لحسابه؟
= لأ مش أي مهندس يعرف يعمل كده.. لازم يكون مهندس قلبه جامد و طموح و عنده إستعداد للمجازفه و إنه يخوض الـRisk دي و مايخافش و فيه مثل بيقول
No Risk No Money

س: بس أكيد الموضوع ده محتاج رأس مال كبير في الأول و أنا بصراحه لسه على قدي يعني؟
= مين اللي قالك إن الموضوع محتاج رأس مال.. أحب أقولك إنك ممكن تبدأ تشيل شغل مقاولات و انت مش معاك غير فلوس مواصلاتك بس.. آه يا سيدي زي مابقولك كده.. اتقل و هافهمك، دلوقتي إنت لما تيجي مثلاً تشطب فيلا أو شقه لعميل.. إنت مابتصرفش من فلوسك.. إنت بتصرف من فلوس العميل.. و دي طريقه في الشغل اسمها Cost Plus ، بتتفق معاه على نظام معين لسداد دفعات مقدمه.. يعني هو يدفع الأول دفعه و بعدين انت تشتغل و قبل ما الدفعه دي تخلص بيكون دفعلك غيرها.. الدنيا كلها شغاله كده.. و دي بصراحه ميزه هايله لأن ده يعتبر الحاجه الوحيده اللي تقدر تعملها بدون رأس مال و في نفس الوقت ربحها كبير.. و معنى إنك مادفعتش من جيبك يعني مافيش Risk واقع عليك تقريباً في حته الفلوس

س: بصراحه الموضوع شدني.. بس إيه بالظبط اللي محتاجه عشان أقدر أشيل شغل مقاولات؟
= هاتحتاج أكتر من حاجه:
1- لازم يكون قلبك جامد و عندك إصرار و ماتيأسش لأن الشغل مش هايجيلك من أول يوم
2- لازم تكون هاتعرف تنفذ الشغل طبعاً يعني لو هاتشيل شغل تشطيبات لاوم تكون فاهم كويس جداً إزاي كل بند في بنود التشطيبات بيتنفذ و لو خرسانات نفس الكلام.. لأنك لو مش فاهم الشغل هايبوظ طبعاً و هاتتسوح و تسوح العميل معاك
2- لازم يكون عندك (دولاب صنايعيه) محترم يعني تكون تعرف صنايعيه و عمال يقدروا ينفذوا كل البنود اللي انت هاتشتغلها و تكون كمان واثق في فنياتهم و مستواهم يعني ماتروحش تجيب أي صنايعيه ماتعرفهمش و السلام لأن دول اللي إما هاينجحوا الشغل أو هايبوظوه
3- لازم تكون بتعرف تحصر كميات البنود و تعملها تسعير و تعرف كمان تعمل مقايسات و مستخلصات و تكتب عقود.. الحاجات اللي فاتت دي هي شغل (المكتب الفني) بس لازم تكون فاهمها كويس عشان من غيرها مش هاتعرف تمشي شغلك أصلاً
4- لازم تكون على درايه بأسعار الخامات في السوق و تبقى عارف هاتشتري الخامات اللي هاتحتاجها منين بأسعار مناسبه.. لازم تبدأ تلف على الأماكن اللي بتبيع كل حاجه ممكن تحتاجها في شغلك
5- يفضل بقى لو انت لسه حديث تخرج إنك يكون معاك إما مهندس أكبر منك يساعدك لو قابلتك حاجه مش فاهمها أو يكون معاك مشرف معماري خبره و ده ممكن يفرق معاك كتير جداً في الشغل
6- تكون بتعرف إزاي تتعامل مع العمال و الصنايعيه لأن التعامل معاهم مش سهل
7- حاول توسع دايره معارفك و علاقاتك لأن دول اللي هايجيبولك الشغل

س: هل لازم أفتح مكتب مقاولات عشان أقدر أشيل شغل؟
= لأ طبعاً مش لازم.. و إوعى تعمل كده في البدايه.. أجل الخطوة دي لما تقف على رجلك ، ممكن تشيل شغل و انت ماعندكش مكتب

س: إمتى أقدر آخد الخطوة دي؟
= التوقيت طبعاً حاجه مهمه جداً.. و مانصحكش تبدأ أبداً تشيل شغل إلا لما يكون عندك المهارات و الخبرات الكافيه اللي تخليك تقدر تبدأ صح.. و لازم تكون اشتغلت فترة كافيه في شركه مقاولات تنفيذ و مكتب فني عشان تتعلم الحاجات اللي هاتفيدك في شغلك الخاص، و الفترة دي بتختلف حسب طبيعه الشغل و معدل اكتسابك للخبره يعني مش فترة ثابته.. في مهندسين ممكن يبدأوا شغل خاص بعد سنه واحدة من تخرجهم و فيه مهندسين بيبدأوا بعد سنين.. و أنا شخصياً أعرف مهندسين خريجي دفعات 2013 و 2014 و بالفعل حالياً بيشيلوا شغل مقاولات بشكل شخصي و ناجحين في شغلهم كمان

س: هل لازم أكون متفرغ ولا ممكن أشيل شغل و أنا شغال في شركه؟
= في البدايه مش لازم تفرغ بس بشرط يكون شغلك الخاص قريب من المكان اللي انت شغال فيه و تكون مواعيد شغلك مناسبه عشان تقدر توفق بين الأتنين و ماتقصرش في حاجه منهم.. و في الحاله دي هاتحتاج يكون معاك حد بيساعدك في متابعه الشغل سواء مهندس زميل ليك أو مشرف معماري

س: طب لو حبيت أشارك مهندسين زمايلي في الموضوع ده ينفع ولا لأ؟
= مافيش مانع طبعاً إنك تشارك حد من زمايلك المهندسين في البدايه عشان تساعدوا بعض.. بس خلي بالك إن أغلب الشراكات بتنتهي بالخلاف و الفشل.. عشان كده لازم تنتقي الشخص اللي هاتشاركه بعنايه و لازم يكون كل شيء محدد من البدايه منعاً للخلاف

س: إزاي أجيب شغل؟
= مممم... صوت شفطه من فنجان القهوة.. دي بصراحه أهم نقطه في الموضوع كله.. و إنك تجيب شغل ده أصعب من إنك تنفذه أصلاً، الموضوع في البدايه هايكون صعب شويه و هايحتاج منك شويه مجهود و وقت و بعدين الدنيا هاتظبط معاك، لازم يكون عندك علاقات و معارف كتير و ممكن أول شغلانه تبقى من طرف حد من قرايبك أو قرايب أصحابك أو جيرانك.. و بعد كده الشغل بيجيب شغل، و فيه شويه حاجات تانيه ممكن تساعدك زي إنك تشتغل تسويق أونلاين على صفحات و جروبات فيسبوك أو إنك تعمل لنفسك كروت شخصيه و تستخدمها في الدعايه في الكومباوندز الجديدة.. و من الأفكار الهايله و اللي بتجيب نتايج سريعه جداً في التسويق هي إنك تتفق مع مكاتب التسويق العقاري لما يبقى قدامهم شغل إنشاءات أو تشطيبات يبلغوك و بيكون ليهم عموله طبعاً

س: هل منطقي إن حد يوافق يديني شغل و أنا لسه جديد و ماعنديش خبره؟
= لأ مش منطقي.. و عشان كده بتكون أول شغلانه في الغالب من طرف المعارف أو العلاقات و القرايب و الأصدقاء.. أو يكون عندك شويه خبرة من شغلك في الشركات

س: هل الأفضل آخد شغل من شركات ولا من أفراد؟
= في البدايه و لأنك لسه عضمك طري و ماعندكش استعداد للمخاطرة يبقى أنصحك بالشغل مع الأفراد.. لأن فلوسهم بتكون حاضره و مابتحتاجش تدفع حاجه من جيبك ده غير إن مش هايطالبوك بأي مستندات رسميه بخلاف لو اشتغلت مع شركات

س: طب شغل الخرسانات و لا التشطيبات أفضل؟
= من حيث الصعوبه لو انت مهندس مدني غالباً هاتكون الخرسانات أسهلك إنما لو معماري هاتكون التشطيبات أنسبلك، و من حيث الربح ده على حسب مستوى و تكلفه الشغل الأتنين مكسبهم كويس.. دوس في اللي هاتلاقيه

س: حاسس إني متردد آخد الخطوة دي و خايف ابدأ و اتسوح؟
= رشفه أخيرة من فنجان القهوة... ده شيء طبيعي و التردد ده حاجه صحيه جداً بشرط مايزيدش عن حده.. و متوقع إنك تكون متردد في البدايه لأن الموضوع يمكن يكون جديد عليك تماماً.. بس حاول تبدأ بشغلانه صغيره عشان ماتخافش و بعدين قلبك هايجمد

60 حاجة متعلمتهاش في الكلية
1. اسم الجامعة أو المعهد مابيفرقش كتير في الشغل

2. حكومة و لا خاص برضه مابقتش تفرق كتير.. يعني لو انت معهد خاص بلاش تبقى طول الوقت حاسس بعقدة الذنب و إنك مش هاتلاقي شغل.. ممكن تشتغل و خريج عين شمس مايشتغلش.. دي أرزاق

3. تقديرك في الكلية حمادة و إنك تشتغل دي حمادة تاني خالص.. يعني مش تقديرك هو اللي هايشغلك.. و لو طلعت من الكلية بمقبول و انت فاهم.. أحسن ماتتخرج بامتياز وانت حافظ

4. الواسطة حاجة مهمة.. بس إجتهادك و تعبك و إصرارك أهم بكتير

5. أهم حاجات عاوزك تطلع من الكلية فاهمها كويس.. هي الـStructures و الخرسانة و إدارة المشروعات.. إنما الهيدروليك بقى و الري و السكة الحديد و الصحية و الحبشتكنات دي مابتأكلش عيش.. بس مش معنى كدة إنك تشيلهم

6. حاول تبطل نقل شيتات.. عارفين إنه طلب صعب بس ده لمصلحتك

7. أصعب و أهم سنة في قسم مدني هي سنة تالتة.. حاول تركز فيها كدة و تعديها في سنة واحدة

8. لما تيجي تختار مشروع التخرج.. إما تختاره عشان سهل أو عشان هايفيدك بعد التخرج.. مش عشان حد حبيبك داخل المشروع و انت مش عاوز تسيبه

9. المشاريع السهلة بتختلف من كلية للتانية على حسب الدكاترة.. و مهم تختار الدكتور اللي هاتعمل معاه المشروع يبقى حد لذوذ و حبوب كدة عشان ماتتنفخش

10. أكتر مشاريع تخرج هاتفيدك في الشغل هما الخرسانة و إدارة المشروعات

11. مش معنى إن مشروع تخرجك طرق يبقى انت هاتشتغل مهندس طرق.. و مش معنى إن مشروع تخرجك مساحة تيقى هاتشتغل مهندس مساحة... لأنك هاتشتغل الشغلانة اللي هاتلاقيها قدامك مش اللي لايقه على مشروع التخرج بتاعك

12. إنت هاتخلص الكلية و تتخرج و انت لسه ما اتعلمتش 5% من اللي سوق العمل محتاجه

13. بتتخرج من الكلية جاهز إنك تبدأ تتعلم

14. مهم إنك تتعلم كاد و ريفيت و ساب و برامج التصميم الإنشائي و بريمافيرا و مكتب فني و إدارة مشروعات و تنفيذ

15. جمع أكبر قدر ممكن من شهادات الكورسات و اهتم جداً بموضوع الشهادة و حاول تعتمدها من كل الجهات و توثقها.. و أول ماتعمل كدة جمع كل الشهادات دي و ولع فيها أو بلها و اشرب ميتها لأن الشهادات دي مش هاتشغلك.. اللي هايشغلك إنك تبقى فاهم اللي سوق العمل محتاجه..

16. حاول تختار الكورسات اللي انت محتاجها صح.. ماتاخدش أي كورسات و السلام.. و مهم جداً تختار التوقيت و الترتيب اللي هاتخد فيه الكورسات دي

17. ماتستناش لما تتخرج عشان تبدأ تاخد كورسات.. لازم تبدأ تطور نفسك من بدري

18. يفضل ماتبدأش تاخد كورسات قبل ماتدخل تانية مدني لأن استفادتك منها هاتكون ضعيفة و إستيعابك هايكون قليل و غالباً هاتنساها على ماتتخرج.

19. بدءاً من سنة تانية ممكن تتعلم حاجتين أساسيتين هما برنامج AutoCAD و الـ Excel و دول حاجتين لا غنى عنهم و من أسهل الحاجات و ممكن كمان تتعلمهم لوحدك Self Study من غير كورسات.

20. كورسات التصميم الإنشائي يفضل ما تاخدهاش قبل سنة تالتة، و أنسب وقت ليها هو بين تالتة و رابعة بحيث تكون درست في الكلية منهج خرسانة تالتة، و كمان عشان ماتنساهمش لأنك إحتمال كبير تحتاجهم في مشروع التخرج في بكالوريوس.. و برامج التصميم الأساسية اللي هاتحتاجها هي برامج الـSap و الـEtab و الـSafe و الـCsi

21. ماتنساش بقى بعد ماتتعلم البرامج دي إنك تتعلم أهم برنامج و هو الـRevit لأن ده هايبقى البرنامج الأول في شركات المقاولات و المكاتب الهندسية في السنين الجاية.

22. بالنسبة بقى لإدارة المشروعات و البرامج الخاصة بيها زي الـPrimavera أنسب وقت ليها هو بعد ماتتخرج.. يعني ماتروحش و إنت لسه بتدرس تاخد كورسات إدارة مشروعات.. إلا لو مشروع تخرجك إدارة مشروعات يبقى في الحالة دي هاتحتاج تتعلم الـPrimavera و إنت في بكالوريوس.

23. نيجي بقى لنقطة مهمة و هي تدريب الموقع.. سواء عندك في الكلية تدريب الموقع إختياري أو إجباري.. حاول تنزل مواقع على قد ماتقدر و أكتر وقت هاتستفيد فيه لو نزلت الموقع هو بين تالتة و رابعة.

24. كل اللي فات ده و إحنا لسه ماتكلمناش عن أهم حاجتين اللي هما 90% من إحتياجات سوق العمل (التنفيذ و المكتب الفني) ، دول بقى تقدر تتعلمهم في أي وقت يناسبك بين تانية و رابعة لأنهم مالهومش علاقة أصلاً باللي انت بتدرسه في الكلية، و لازم تبقى عارف إن دول حاجة أساسية لأنك لو ما اتعلمتش تنفيذ و مكتب فني فرصتك في الشغل بعد ماتتخرج هاتنحصر فقط في الـ 5% بتوع التصميم.

25. بعد ماتتخرج قدامك 3 سنين ممكن تتعلم فيهم إدارة المشروعات في أي وقت يناسبك مش لازم أول ماتتخرج على طول بس لو هاتشتغل في المكتب الفني يبقى يفضل تتعلم Primavera

26. اللي حابب يتجه لإدارة المشروعات يفضل يعمل دبلومه PRMG من الجامعه الأمريكيه و بعد 3 سنين من تخرجه يمتحن لشهادة الـPMP

27. فيه بعض البرامج التخصصية اللي ممكن تحتاجها حسب مشروع تخرجك زي برامج لتصميم الـSteel أو برامج مساحية أو برامج للطرق.. دي ماتاخدهاش إلا لما تحتاجها على حسب مشروع تخرجك طبعاً.

28. فيه أكتر من 40 ألف مهندس هايتخرجوا غيرك في نفس السنة بتاعتك.. لازم تكون مختلف عنهم عشان فرصتك في الوظيفة تكون أكبر

29. بطل شقاوة و ماتروحش قسم عمارة كتير

30. دور على الوظيفة اللي تديلك خبرة و بعد كده الخبره هي اللي هاتجيبلك الفلوس لحد عندك.

31. الواسطة ممكن تجيبلك شغل بس الواسطة لوحدها مش هاتخليك تستمر و تكبر في الشغل ده.

32. على قد ماتتعب على قد ما ربنا هايكرمك.

33. الشغل في أوله كده كده بهدله.. بس لما تتبهدل في بلدك غير لما تتبهدل بره.

34. ماتقلقش من تأخر الوظيفة.... بكره تفرج...... شوية تفاؤل.

35. أفضل شغل تبدأ بيه هو شغل الموقع و التنفيذ في شركات المقاولات.. صعب شويه بس هو ده اللي هايخليك تبقى مهندس بجد.

36. إعرف شيء عن كل شيء و إعرف كل شئ عن شئ.

37. بلاش تتخصص في مجال واحد في بداية حياتك عشان ما تحصرش نفسك فيه.. خلي التخصص قدام شويه.

38. شهادة التخرج لوحدها مش هاتشغلك.. طور نفسك و اتعلم اللي ناقصك عشان إحنا بنتجوز بالشهادات و بنشتغل بالحب

39. لو حابب تعمل ماستر.. راجع نفسك كويس في اختيار المجال اللي هاتحضر فيه و يفضل لو هاتحضر يكون في جامعه أجنبيه و أفضل مجالات تحضر فيها ماجيستير هي إدارة المشروعات و الخرسانه

40. خبرة الشغل أهم من تحضير الماجيستير على فكرة.

41. مهندسين إدارة المشروعات هما الطبقه الراقيه من المهندسين

42. الغربة بهدلة.. فماتسافرش غير على راتب محترم و ماتسافرش إلا لما تتعلم تشتغل.

43. ماتستناش من حد في الشغل يعلمك.. الناس إتغيرت.. لازم تعتمد على نفسك.

44. حاول إنك ما تبدأش تشتغل في مكتب إستشاري.. المقاولات بتعلم أفضل.

45. كل المهندسين اللي في الدنيا في يوم من الأيام كانوا حديثي تخرج... ماتيأسش.

46. خلي بالك من الكورسات المضروبة

47. إسأل على المحاضر و المكان اللي هاتحضر فيه الكورس الأول عشان ماتضيعش وقتك و فلوسك ع الفاضي.

48. ما تضايقش لو بدأت براتب صغير.. كلها سنتين و الدنيا هاتظبط و تاخد راتب محترم.

49. ماتقبلش أبداً بأي وظيفة يخلوك فيها توقع على شرط جزائي أو إستقالة مع العقد.. دي تبقى شركة أي كلام.

50. ماتخليش مقاول يقولك تعالى أأمن عليك و يديلك قرشين..

51. لو إنتي مهندسه.. المكتب الفني و إدارة المشروعات هما أنسب شغل ليكي

52. إنسى إنك إتعلمت حاجه في الكلية.. إنت لسه هاتبدأ تتعلم بعد ما تشتغل.

53. لما تقدم في شركة حاول تسأل عليها الأول.

54. مش هاينفع تبقى مدير مشروع ناجح إلا لما تنزل موقع و تتعامل مع الصنايعية.

55. لو قررت تسيب أي شركة.. ماتقطعش علاقتك بالناس اللي فيها.. عشان ممكن تحتاجلهم بعدين و خليك عارف إن الدنيا صغيرة.

56. بالنسبة لرواتب المهندسين في مصر المفروض المهندس دفعة 2015 راتبه مايقلش عن من 1500ج إلى 2000ج و كل دفعة أقدم تزيد 500ج و ده طبعاً بيختلف حسب الشركة و الوظيفة.

57. ماتسافرش السعودية على أقل من 4000 ريال صافي لو انت دفعة 2015، و كل دفعة أقدم بفرق 1000 ريال و تقدر تقيس على كدة باقي الدول التانية.

58. لو شركة اتصلت بيك ماتسألش على الراتب في التليفون.. إستنى ليوم الإنترفيو.

59. بلاش تقول مش لاقي شغل.. كتير من دفعتك اشتغلوا من غير مايكون معاهم واسطة.. اتعب شويه عشان تلاقي.

60. تسليم الـCV باليد بيجيب نتايج هايله.